Туркманистонда мамлакатнинг собиқ бош прокурори Аманмират Халлиев ҳамда прокуратура ва ички ишлар идораларида ишлаган 50 чоғли ходим ҳибсга олинди.
Манбаларга кўра, собиқ бош прокурор 4 майдаги Хавфсизлик кенгаши мажлисидан бир неча кун ўтгач ҳибс этилган.
Туркманистон президенти Қурбонқули Бердимуҳаммедов Халлиевни коррупция ва порахўрликка қарши кураша олмаганликда айблаган. Аввалроқ Озодлик туркман хизматининг манбалари Халлиев ва унинг қўл остида ишлаган кишилар Осиё ўйинларини молиялаштириш учун бадавлат кишилардан маблағ йиғиш ишини амалга оширолмаганлари учун ишдан олинганларини маълум қилгандилар.
Туркманистон бу йил V Осиё ўйинларига мезбонлик қилиши керак. Таҳлилчиларга кўра, жаҳонда нефть ва газ нархларининг пасайиб кетиши қабатида Туркманистонда иқтисодий бўҳрон ҳолати кузатилмоқда, шу сабабдан расмийлар Осиё ўйинларига молиявий кўмак кўрсатишларини сўраб маҳаллий тадбиркорларга мурожаат қилганлар.
Ашхободдаги Осиё ўйинларига, маълумотларга кўра, шу кунгача 8 миллиард доллар миқдорида маблағ сарфланган. Бундан 5 миллиарди Олимпия шаҳарчаси қурилишига, 2,3 миллиарди эса янги халқаро аэропорт қурилишига кетган.