“Ўзбекистон Республикаси Президенти Шавкат Мирзиёевнинг 10 сентябрь куни Остона шаҳрида бўлиб ўтган Ислом ҳамкорлик ташкилотининг Фан ва технологиялар бўйича биринчи саммитида сўзлаган нутқи хорижий оммавий ахборот воситаларида катта қизиқиш уйғотди. Уларда давлатимиз раҳбарининг нутқида билдирилган асосий фикрларга алоҳида эътибор қаратилган кўплаб материаллар чоп этилгани ҳам бундан далолат беради”, деб бошланади ЎзА ахборот агентлигининг ҳорижий ОАВ шарҳи.
Агентлик Би-Би-Си Ўзбек хизмати, Озодлик радиоси, Uaport.net,
vb.kg, Sputniknews-uz.com, Kazpravda.kz, Kant.kg, ca-news.org сайтлари материлларидан иқтибослар келтирган, ёзганлари баёнини берган.
Хусусан, ЎзА Озодлик радиоси (ozodlik.org) “Ўзбекистон Президенти мусулмон мамлакатлари олимларининг фан ва технологияларни ривожлантиришга қўшган ҳиссасини муносиб тақдирлаш мақсадида ИҲТ мукофотини таъсис этишни таклиф қилгани, бу, айниқса, ёш олимларга илмий-технологик йўналишлардаги изланишларини янада фаоллаштиришга рағбат бўлишини қайд этгани”ни хабар қилган.
ЎзА ахборот агентлиги тилга олган сайтларнинг кўпчилиги, хусусан, ozodlik.org сайтига Ўзбекистонда қўйилган тўсиқ йиллардан буён олинмай келмоқда.
Kun.uz сайти ЎзАнинг ҳорижий ОАВлари дайжестини бергани тўғрисидаги хабарини "Ёмонласа блоклаймиз, мақтаса эътироф этамиз". ЎзА BBC ва «Озодлик»дан иқтибос келтирди", деган сарлавҳа остида эълон қилди.