Руминия пойтахти Бухарестда минглаб одамлар қирол Михай I ни сўнгги йўлга кузатиш маросимида иштирок этмоқда.
Иккинчи жаҳон уруши пайтида руминларнинг миллий қаҳрамонларидан бири бўлган Михай 5 декабрь куни Швейцарияда оғир касалликдан сўнг 96 ёшида вафот этган эди.Унинг жасади Бухарестга олиб келинди ва видолашув маросими учун қирол саройига ўрнатилди. Дафн маросими шанба куни бўлиб ўтади.
Гогенцоллерн династияси вориси бўлган Михай Руминияга икки марта - 1927 йилдан 1930 йилгача ҳамда 1940 йилдан 1947 йилгача қироллик қилди. У 1944 йилда Гитлернинг иттифоқчиси бўлган Руминия бош вазири Йоан Антонескуни ҳокимиятдан четлатган давлат тўнтаришига раҳбарлик қилган ҳамда Руминияни Гитлерга қарши иттифоққа қўшган эди.
Руминияда 1947 йилда коммунистлар ҳокимияти ўрнатилиши оқибатида қирол Михай мамлкатни тарк этишга мажбур бўлган ва Швейцарияда яшай бошлаган. У Швейцарияда камтарона ҳаёт кечириб, механик ва фермер бўлиб ишлаган.
Михайга фақат 2002 йилдагина ватани Руминияга қайтишга рухсат берилган эди. У Совет Иттифоқи томонидан “Победа” ордени билан мукофотланган энг ёш одам бўлган.