БМТнинг Инсон ҳақлари идораси Туркия ҳукуматидан 2016 йил июль ойида муваффақиятсиз тугаган давлат тўнтаришидан сўнг жорий этилган фавқулодда ҳолатни тугатишни сўради. БМТ расмийларига кўра¸ бундай ҳолатнинг сақланиб қолаëтгани инсон ҳақларининг кенг кўламли топталишига сабаб бўлмоқда.
Аммо бу сўровни "тарафкашлик" деб баҳолаган Туркия ҳукумати уни қабул қилмаслигини билдирди.
БМТ мутахассислари президент Режеп Таййип Эрдўғон 2016 йил ëзидан бери чиқарган 20 дан ошиқ қарор ва фармон ҳибсга олинганларни қийноққа солиш ва судлар ишига аралашишга йўл очганини танқид қилди.
“Туркия зудлик билан фавқулодда ҳолатга барҳам бериши ва давлат тизимларининг нормал ишлаши ҳамда қонун устиворлигини қайта тиклаши керак”¸ дейилади Инсон ҳақлари бўйича БМТ идораси 20 март куни чиқарган ҳисоботда.
Унда ëзилишича¸ ўтган 18 ой ичида Туркияда 160 мингдан кўпроқ одам ҳибсга олинган¸ 152 минг нафар давлат хизматчиси ишдан бўшатилган ва уларнинг кўпи қийноққа солинган.