Германия канцлери Ангела Меркель Туркия томонидан Суриянинг Африн минтақасида курд жанггариларига қарши ўтказилаётган амалиётни қоралади.
21 март куни Германия парламентида қилган чиқишида Ангела Меркель:
- Афринда бўлаётган воқеани қабул қилиб бўлмайди, чунки минглаб тинч аҳоли таъқиб қилинмоқда, ўлдирилмоқда ёки уйларини ташлаб қочишга мажбур бўлмоқда. Биз Африндаги ҳаракатларни энг кучли сўзлар билан қоралаймиз,- деб айтди.
Туркия президенти Режаб Тоййип Эрдўғон 18 март куни Суриянинг Африн шаҳри тўлиқ турк ҳарбийлари ва иттифоқчи жанггарилар томонидан босиб олинганини билдирган эди.
Туркия 20 январда Вашингтон қаршилигига қарамай Суриянинг Африн минтақасидаги курд жанггариларига қарши ҳарбий амалиётни бошлаган.
АҚШнинг “Ислом давлати”га қарши курашдаги ҳамкори бўлиб келаётган курд жанггариларини Туркия “террорчи гуруҳ” сифатида талқин қилиб келади.
Меркель ўз сўзида Ғута шарқидаги бомбардимонларни ҳам кескин қоралади. Германия раҳбари Ғутада минглаб одамлар ва болаларнинг ўлими учун масъулият президент Башар Ассад зиммасида эканини айтиб, Россия хунрезликнинг олдини олиш учун босим кўрсатмай, оддий кузатувчи бўлиб турганини танқид қилди.
Россия 20 март куни БМТ Хавфсизлик кенгашининг Суриядаги инсон ҳуқуқларига оид резолюциясини блок қилиб қўйган.