Қирғизистон Миллий хавфсизлик қўмитаси "Республика - Ата-Журт" партияси раиси, 2017 йилда ўтган сайловда президентликка номзод бўлган Ўмурбек Бабановни “ҳокимиятни босиб олишни режалаштирганлик”да гумонламоқда.
Қўмита матбуот котиби Рахат Сулаймановнинг Озодликка билдиришича, Бабановга нисбатан “ҳокимиятни босиб олишга тайёргарлик кўриш” ва “оммавий тартибсизликларни уюштириш” моддалари асосида жиноят иши очилди.
Бу Бабановга нисбатан қўзғатилган иккинчи жиноят ишидир. 2017 йилнинг 4 ноябрида Бош прокуратура “Конституциявий тузимни куч билан алмаштиришга ошкора чақириш”, “Миллий, ирқий ва диний низо қўзитишга уриниш” моддалари билан Ўмурбек Бабановга қарши жиноят иши очган эди. Бунга Бабановнинг ўтган йил октябрь ойида Ўшдаги ўзбек сайловчилар билан учрашган пайтида сўзлаган нутқи сабаб бўлган.
Бироқ Ўмурбек Бабановнинг ўзи Ўшдаги учрашув пайтида сайловчиларга президент бўлиб қолса, мамлакатда яшовчи барча миллат вакилларининг тенг ҳуқуқлилигини таъминлаши тўғрисида сўзлаган нутқи нохолис одамлар томонидан бузиб талқин қилингани ҳақида билдирган.
Сайловда амалдаги президент Сўўрўнбай Жээнбековдан кейин энг кўп овоз олган Ўмурбек Бабанов 2017 йил 15 октябрда ўтган овоз бериш жараёнидан сўнг Қирғизистонни тарк этган.