АҚШнинг собиқ биринчи хоними, Қўшма Штатлар 41-президентининг рафиқаси ва 43-президентининг онаси Барбара Буш 17 апрель куни кечқурун 92 ёшида вафот этди.
Барбара Буш Катта Жорж Буш президент бўлиб турганида америкаликлар ўртасида турмуш ўртоғига нисбатан машҳурроқ эди. У ҳеч қачон омма олдида ўз сиёсий қарашлари ҳақида гапирмаган. Уни америкаликлар катта оиланинг меҳрибон онаси сифатида билганлар.
Барбара ва Катта Жорж Буш турмуш қурганига 72 йил бўлган эди. Барбара Буш АҚШ президентига турмуш ўртоқ ва она бўлган икки нафар америкаликдан биридир.
Ундан аввал бу мақомга фақат АҚШнинг иккинчи президенти Жон Адамснинг рафиқаси ва олтинчи президент Жон Куинси Адамснинг онаси Эбигейл Адамс эга бўлган эди.