Бельгиянинг Льёж шаҳрида содир этилган ҳужум террор ҳаракати сифатида баҳоланмоқда. Бу ҳақда шаҳар прокурори маълум қилди.
29 май куни содир этилган ҳужумда 4 одам, жумладан, ҳужумчининг ўзи ҳам ҳалок бўлган эди. Ҳужумда ўлганларнинг икки нафари полициячидир.
- Ҳужумчининг асосий мақсади полициячиларни ўлдириш бўлган. У полициячи аёлларга орқадан келиб ҳужум қилган. Полициячиларни ўлдиргач, ҳужумчи 22 ёшли йигитни отган ҳамда Леони де Ваха мактабига яшириниб, у ерда 2 аёлни гаровга олган,-деди Льёж полицияси бошлиғи Кристиан Бопер.
Хабарда айтилиишча, мактабга яширинган ҳужумчи отиб ўлдирилган, гаровга олинган аёллар озод этилган.
Бельгиянинг RTBF телеканали ҳужумчи 36 ёшли Бенжамэн Эрман экани тўғрисида хабар берди. У аввал “енгил жиноят”ни содир этганликда айбланиб қамалиб чиққан.
Полиция Эрман қамоқда ўтирганда радикалларга қўшилиб қолган бўлиши мумкин, деб таҳмин қилмоқда.