Vashington bilan Pekin erishgan bitimga ko‘ra, Xitoyning yirik ZTE Corp. telekommunikatsiya kompaniyasi AQShning Eron va Shimoliy Koreyaga qarshi sanksiyalarini buzgani uchun 1 milliard dollar jarima to‘laydi va evaziga biznesini saqlab qoladi.
7 iyun kuni e’lon qilingan jarima miqdori 892 million dollardan oshadi. ZTE AQSh sanksiyalariga zid ravishda Eron bilan Shimoliy Koreyaga jihozlar sotgani uchun ayni miqdordagi jarimani to‘ladi.
AQSh Savdo vazirligidan ma’lum qilishlaricha, ZTE yana 400 million dollarni garov sifatida bankka omonat qilib qo‘yishi shart. Agar u so‘nggi bitim shartlarini buzadigan bo‘lsa, ushbu mablag‘ musodara qilinadi.
Yangi bitimda ZTEga oldin Amerika kompaniyalaridan sotib olishga qo‘yilgan taqiqlar bekor qilindi. Xitoy kompaniyasi vakillari taqiqni o‘z biznesiga tahdid deb hisoblayotgan edi.
Bundan tashqari, ZTE tarkibiga Qo‘shma Shtatlar tanlagan va sanksiya talablariga rioya etilishini kuzatib boruvchi guruh kiritiladi. Yangi bitim talablariga asosan, Xitoy kompaniyasi direktorlar kengashi va ijrochilar guruhi o‘zgartiriladi.
Aprel oyida Savdo vazirligi ZTEning o‘zi ishlab chiqarayotgan uyali telefonlar va boshqa telekommunikatsiya jihozlari uchun AQShdan butlovchi qismlarni import qilishiga 7 yillik taqiq joriy etgan edi. Ayni jarimaga ushbu kompaniyaning o‘tgan yili sanksiya talablarini buzgani sabab qilib ko‘rsatilmoqda.
AQSh butlovchi qismlariga qaram bo‘lib qolgan ZTE kompaniyasi uchun bunday chora biznesining to‘xtab qolishi bilan barobar. Bir tayoqning ikki uchi bo‘lganiday, ushbu taqiq Xitoyga butlovchi qismlar eksport qiladigan Qualcomm singari AQSh kompaniyalari biznesiga ham salbiy ta’sir ko‘rsatdi.
ZTE bo‘yicha erishilgan so‘nggi bitim Qo‘shma Shtatlarning Xitoy bilan savdo-sotiq sohasidagi keng qamrovli muzokaralariga yo‘l ochib berishi shubhasiz.
Ikkala mamlakat bir-birining mahsulotlariga 200 milliard dollarlik boj joriy qilish bilan o‘zar tahdid qildi. Bunga Xitoyning o‘z ichki bozoriga AQSh kompaniyalarini kiritish uchun bir narsani shart qilib qo‘ydi. Nima emish, AQSh kompaniyalari evaziga o‘z savdo sirlarini Xitoy tomoniga ochishi kerak emish.