Македония парламенти Греция билан имзоланган мамлакат номини ўзгартириш тўғрисидаги шартномани ратификация қилиш жараёнини бошлади. 19 июнда парламентдаги кўпчилик депутатлар шартномани тезкор процедура асосида тасдиқлаш таклифини қўллаб-қувватлади.
Парламент шартномани тасдиқлагач, у президентга имзолаш учун юборилади. Бироқ Македония президенти Гёрге Иванов 14 июнда бу шартномани имзолашдан бош тортишини айтган эди.
Айни пайтда Македонияда мамлакат номини ўзгартиришга қарши намойишлар уч кундан бери давом этмоқда. Норозилар бош вазир Зоран Заевнинг истеъфосини талаб қилмоқда.
Греция 27 йилдан бери Македония номи ўзгартирилишини талаб қилиб келаётган эди. 12 июнда Македония бош вазири Зоран Заев узоқ йиллар давом этган музокаралар якунланиб, Афина ва Скопье мамлакат номини Шимолий Македония деб номлаш тўғрисида келишиб олганларини айтган.
Афина ва Скопье ўртасидаги узоқ йиллик баҳсга нуқта қўйилиши Македония учун Европа Иттифоқи ва НАТОга аъзо бўлиш имкониятини яратди.