Россия фуқароси Мария Бутина Вашингтонда хориж давлати агенти сифатида гумонланиб қўлга олинди.
АҚШ қонунчилигига асосан хориж агенти сифатида фаолият юритаётган шахс бу ҳақда олдиндан ҳукуматни огоҳлантириши шарт. 29 ёшли Мария Бутина бу қонунга амал қилмагани айтилмоқда. Мазкур айблов асосида у 5 йилгача озодликдан маҳрум қилиниши мумкин.
АҚШ Адлия вазирлигининг билдиришича, Бутина 15 июлда қўлга олинган. Расмий билдирувга кўра, Бутина Россия манфаатини олға суриш мақсадида АҚШ сиёсатига таъсир кўрсата оладиган доиралар билан муносабат ўрнатиш топшириғига эга бўлган.
Адлия вазирлиги баёнотида, жумладан, Бутина 2015 йилдан 2017 йилгача Россия ҳукуматидаги юқори лавозимли амалдор қўл остида ишлагани, дастлаб Россия думаси депутати бўлган бу шахс кейинроқ Марказий Банкда юқори лавозимни эгаллагани айтилади. Маълумотда билдирилишича, бу амалдор АҚШ Молия вазирлиги 2018 йил апрелида санкция жорий этган шахслар рўйхатига киритилган.
The New York Times газетасининг ёзишича, Бутина 2016 йилда Россия президенти Владимир Путин ва ўша пайтда сайловолди тарғиботини олиб бораётган Дональд Трамп ўртасида яширин учрашув уюштиришга ҳаракат қилган.