АҚШ Давлат котиби Майк Помпео Калифорния штатининг Сими-Вэлли шаҳрида Эрон диаспораси вакиллари билан учрашди.
Учрашувда Помпео “Эрон режими одамлар учун даҳшатдир”, деб айтди. Давлат котибига кўра, Эрон ва жаҳоннинг 6 етакчи давлати билан эришилган шартнома ортидан Теҳронга нисбатан санкцияларнинг бекор қилиниши эронликлар ҳаётини фаровонлаштириши мумкин эди.
- Ядровий битим имзоланиши ортидан Эроннинг нефтдан оладиган даромадлари кўпайди ва бу маблағ Эрон халқи ҳаётини яхшилашга сарфланиши лозим эди. Бироқ бунинг ўрнига бу пуллар террорчиларга ва жанггариларга жўнатилаяпти. Бугунги кунда Эрон режимининг субсидиялари оқибатида Хезболла жанггарисининг ўртача даромади Эрон ўт ўчирувчисининг ойлигидан уч баробарга кўп бўлмоқда,-деди Помпео.
Теҳрон ва Вашингтон ўртасидаги муносабатлар 2017 йилда Дональд Трамп АҚШ президенти лавозимига киришиши билан кескин ёмонлашди. 2017 йил баҳоридаёқ АҚШ Эрон ядро дастури бўйича ҳаракатларнинг биргаликдаги ҳар томонлама режасидан чиқди, шунингдек, бу мамлакатга қарши шу битим доирасида бекор қилинган санкцияларни кенгайтирди.
2015 йилда бир томондан Буюк Британия, Германия, Хитой, Россия, Франция ва АҚШ, бошқа томондан Эрон имзолаган битим Эрон ҳукумати ядро дастурларини ёпиши эвазига АҚШ ва Европа Иттифоқи томонидан қўйилган санкцияларни Теҳрондан олиб ташлашни назарда тутади.