Тожикистонда велосипед билан саёҳат қилаётган хориж фуқароларига уюштирилган ҳужум учун масъулиятни “Ислом давлати” гуруҳи ўз зиммасига олди. Гуруҳга мансуб бўлган Amaq агентлиги 30 июль куни бу ҳақда маълум қилди. Бироқ хабарда исбот сифатида воқеанинг тафсилотлари билдирилган эмас.
29 июль куни Тожикистон жанубидаги Данғара туманида маҳаллий вақт билан 15.30 велосипедда саёҳатга чиққан Нидерландиянинг бир фуқароси, Швейцариянинг бир фуқароси ва икки нафар америкалик ҳалок бўлган эди.
Тожикистон Ички ишлар вазири Рамазон Раҳимзода 30 июлда Данғарада содир бўлган воқеанинг террор ҳужуми бўлгани версияси ҳам ўрганилаётганини айтганди:
-Тергов жараёнида туман ҳудудида сайёҳларни босиб кетган автомашина топилди. Шундан сўнг воқеа жойидан қочиб кетган гумонланувчиларнинг шахсини аниқладик. Улардан бири қўлга олинди, яна бири отишма пайтида жисмонан йўқ қилинди, учинчиси эса қидирувга берилди, -деди Раҳимзода.
Ички ишлар вазирининг айтишича, “Ҳайдовчи ва унинг ҳамроҳлари машинани хорижий сайёҳлар устига ҳайдаганидан сўнг салондан чиқиб, уларга пичоқ билан ҳужум ҳам қилган”.