АҚШ президенти Доналд Трамп Эрон президенти Ҳасан Руҳоний билан "ҳеч бир шартларсиз" учрашиши мумкинлиги ва икки мамлакат ўртасидаги муносабатларни яхшилашни муҳокама қилмоқчи эканини айтмоқда.
− Мен ҳар ким билан учрашишим мумкин. Учрашувлар фойда беришига ишонаман, − деди Трамп 30 июль куни Италия бош вазири Жузеппе Конте билан Оқ Уйдаги учрашувидан сўнг ўтказилган қўшма матбуот конференциясида.
У “гап уруш, ўлим, очарчилик ва бошқа нарсалар ҳақида кетаётганда, бошқа кишилар билан гаплашиш фойда бериши”га ишонишини айтди.
− Мен эронликлар билан учрашиш фикрида қатъийман, фақат улар бунга рози бўлса кифоя. Улар бунга тайёр ёки йўқлигини билмайман. Шу кунларда уларнинг аҳволи жуда танг. Лекин мен Эрон билан эришилган битимни бекор қилдим, у кулгили битим эди. Улар бир кун келиб, учрашувга рози бўлишига ишонаман. Улар истаган вақтда учрашишга тайёрман, − деб айтди Трамп.
Трампдан, учрашув олдидан шартлар қўясизми, деб сўралган саволга у, “Йўқ, олдиндан шартлар қўймайман”, деди у.
Президентнинг қўшимча қилишича, “бу мамлакат учун, уларнинг ўзи учун, биз учун ва бутун дунё учун яхши бўлади”.
Эрон раҳбарлари Трампнинг таклифини бирдан рад этмади, чунки улар АҚШ президентидан олдин ҳам таклифлар олган эди.
Ўшанда Трамп уларга Эрон билан унинг ядро дастури борасида эришилган 2015 йилги битим ўрнига янгисини муҳокама қилишни таклиф қилган эди.
Эрон томони бунга кўнмагач, АҚШ май ойида битимдан чиқиб кетди.
Руҳонийнинг катта маслаҳатчиси Ҳамид Абутолибийнинг 31 июлда тахмин қилишича, Қўшма Штатлар билан музокараларни қайтадан бошлаш бошқа масалалар қаторида 2015 йилги битим масаласини ҳам қамраб олади.
‒ Эрон халқининг ҳақларини ҳурмат қилиш, душманликни камайтириш ва ядро дастури тўғрисидаги битимга амал қилишга қайтиш Эрон билан Америка ўртасидаги музокараларга йўл очиб бериши мумкин, ‒ деб ёзди Твиттерда Абутолибий 31 июль куни.
1979 йили Эронда рўй берган инқилобдан бери АҚШнинг ҳеч бир президенти Эрон раҳбари билан учрашгани йўқ.
Ўшанда АҚШнинг иттифоқчиси бўлган шоҳ тахтдан ағдарилган эди.
Оқ Уйнинг маълум қилишича, Трам Эронга учрашув таклифи билан чиққан эса-да, Вашингтоннинг Теҳронга қўйган талабларидан воз кечгани йўқ.
АҚШ давлат котиби Майк Помпео CNBC телеканалига, “президент одамлар билан муаммоларни ҳал этиш учун учрашмоқчи”, деб айтди.
Трамп Эронга музокара таклиф қилар экан, ушбу мамлакатга АҚШ қайта санкция жорий қилаётгани сабаб юзага келаётган иқтисодий муаммолар “оғриғи”ни енгишда ёрдам бермоқчи эканини айтди.
Яқин кунларда кучга кирадиган санкциялар ҳақидаги хабарлар Эрон пул бирлиги – риалнинг қадри кескин тушиб кетишига олиб келди.
30 куни қора бозорда 1 АҚШ доллари 122 000 риалга сотилди.
Ўтган ойдамиллий пул бирлигининг кескин қадрсизланиши Теҳрон шаҳрида норозилик намойишларини келтириб чиқарган эди.