АҚШ Иккинчи Жаҳон уруши пайтида фашистларнинг Польшадаги «Травники» концлагерида қўриқчи бўлиб ишлаган 95 ёшли Яков Палийни Германияга топширди. «Травники» лагерида 6 минг яҳудий ўлдирилган эди.
Associated Press агентлигининг билдиришича, Палий АҚШ ҳудудида яшаб келган энг сўнгги фашист бўлди. У ўзининг ўтмиши тўғрисида ёлғон маълумот берган ҳолда АҚШга 1949 йилда кўчиб келган.
Бундан ўттиз йил аввал полиция унинг исми жиноятчи нацистлар рўйхатида қайд этилганини аниқлаган. 1993 йилда Палий фашистлар билан ҳамокрлик қилганини тан олган.
2003 йилда АҚШ суди Палийни яҳудийларга қарши жиноятларни содир этишда айбдор деб топган ва уни фуқароликдан маҳрум қилган эди. АҚШ уни депортация қилмоқчи бўлган, бироқ Германия, Украина ва Польша уни қабул қилишдан бош тортган.
Жорий йилнинг мартида АҚШнинг Германиядаги элчиси лавозимига киришган Ричард Гренеллга президент Дональд Трамп Палий ишини тезроқ ҳал этиш топшириғини берган эди. Берлин билан ўтказилган музокралардан сўнг Германия Яков Палийни қабул қилишга рози бўлган. Германия ҳукумати фуқаролиги бўлмаган шахс сифатида қабул қилинган Палийни қариялар уйига жойлаштиргани хабар қилинди.
2009 йилда Германия шу тарзда АҚШдан депортация қилинган яна бир жиноятчи фашист Иван Демьанюкни ҳам қабул қилган эди. У 2011 йилда 28 минг одам ўлимида айбдор деб топилган. У орадан 10 ой ўтиб, 91 ёшида вафот этган.