27 avgust kuni Shavkat Mirziyoev raisligida o‘tkazilgan xos yig‘ilish davomida prezident devoni tuzilmasida jiddiy o‘zgarishlar qilingani ma’lum bo‘ldi.
Prezident matbuot xizmati rasmiysining Ozodlikka bildirishicha¸ prezident devoni bundan so‘ng prezident ma’muriyati etib qayta tashkil etiladi va hozirgacha prezident ijroiya apparati rahbari-maslahatchi sifatida faoliyat ko‘rsatib kelayotgan Zaynobiddin Nizomiddinov ma’muriyat rahbari etib tayinlangan.
Ayni manbaning bildirishicha¸ endilikda davlat maslahatchisi instituti tugatilib, davlat maslahatchilari prezident maslahatchilariga aylantirilgan.
Buning ortidan Qahramon Quronboev va Xayriddin Sultonov davlat lavozimdan olinib, boshqa ishga o‘tkazilgan.
Aytilishicha¸ Quronboev prezident devonida Fan, ta’lim, sog‘liqni saqlash va sportni rivojlantirish masalalari bo‘yicha sektor rahbari Abdujabbor Abduvohidovga o‘rinbosar bo‘lgan¸ ayni paytda¸ «Yoshlar ittifoqi» raisi lavozimida qolgan.
Shaxsi ochiqlanmagan manbaga tayangan Kun.uz nashri¸ Xayriddin Sultonov boshqargan xizmat rahbarligi Abdujabbor Abduvohidovga topshirilganini yozdi. “Sultonov spichrayter (nutq yozuvchi) sifatida prezident ma’ruzalarini tayyorlashda davom etadi»¸ deb bildirgan Kun.uz manbasi.
Aytilishicha¸ lavozimidagi "davlat" degan so‘zdan ajragan Rustam Qosimov, Rustam Inoyatov, Viktor Mahmudov (Xavfsizlik kengashi kotibi) hamda Tursinxon Xudeybergenov maslahatchi maqomini saqlab qolgan. Prezident devoniga Karimov davrida ham¸ Mirziyoev prezidentlikka kelganidan so‘ng ham rahbarlik qilib kelgan Zelimxon Haydarovning ishda qolgani yoki pensiyaga chiqqani haqida hozircha aniq ma’lumot yo‘q. Ozodlik gaplashgan matbuot xizmati vakili¸ Haydarovning ishda qolganini aytdi¸ ammo uning yangi lavozimi qanday nomlanishiga oydinlik kiritmadi.
Ozodlik bu o‘zgarishlarga oid tafsilotlar¸ ularning hokimiyat boshqaruvining keyingi faoliyatiga ta’siriga oid ma’lumotlarni o‘rganishda davom etadi.
(Bu jarayonga bevosita aloqador bo‘lsangiz¸ tafsilotlarni Ozodlkning Telegram kanaliga yuborishingiz mumkin.)