Ўзбекистон Адлия вазирлиги кейинги 12 йил ичида биринчи марта АҚШ нодавлат ташкилотини рўйхатдан ўтказди.
Вазирлик эълон қилган хабарга кўра¸ 29 август куни Адлия вазири ўринбосари А.Тошқулов АҚШнинг Ўзбекистондаги элчиси Памела Спартленга Халқаро таълим бўйича Америка кенгашлари (American Councils for International Education-ACIE)нинг Ўзбекистондаги ваколатхонаси давлат рўйхатидан ўтганлиги ҳақидаги гувоҳномани топширган.
Маркази Вашингтонда жойлашган Америка кенгаши дунë бўйлаб таълим дастурлари¸ асосан инглиз тилини ўқитиш ва талабалар алмашинуви билан шуғулланади.
Жорий йил май ойида Вашингтонга сафар қилган Шавкат Мирзиëев АҚШда ислоҳотчи сифатида қабул қилинди ва 28 август куни Давлат департаменти Америка кенгашининг Тошкентда қайта очилишини ислоҳотлар йўлидаги навбатдаги қадам сифатида олқишлади.
Ўзбекистоннинг АҚШдаги элчиси Жавлон Ваҳобов ҳам Twitterдаги ўз саҳифасида Америка кенгашининг қайта очилишини табриклади.
Шавкат Мирзиëев ҳокимиятга келгандан кейин 2005 йилги Андижон воқеалари ортидан Ўзбекистондан ҳайдалган халқаро ташкилотлар Ўзбекистонга қайтиш ҳаракатини бошлади.
2017 йил сентябрида Ўзбекистонда фаолияти суд томонидан тақиқланган Human Rights Watch делегацияси 7 йиллик танаффусдан сўнг Тошкентга борди.
Жорий йил май ойида Amnesty International делегацияси ҳам кейинги 14 йил ичида биринчи бор Ўзбекистонга сафар қилди.