Эрон президенти Ҳасан Руҳоний ўз мамлакати террорчиликнинг ҳар қандай кўринишига қарши курашишини билдирди.24 сентябрь куни Нью-Йоркда БМТ Бош Ассамблеясининг 73- сессияси арафасида сўзлаган нутқида Руҳоний:
-Мен шанба, 22 сентябрь куни Ахваз шаҳрига қўрқоқларча қилинган террор ҳужумида фожеали ҳалок бўлган шаҳидлар ҳақига дуодаман. Улар қабрларида тинч ётишлари учун мен бу ерда менинг миллатим террорчиликнинг барча кўринишига қарши кескин курашишга тайёр эканини айтмоқчиман,-деб билдирди.
Эрон халқаро даражада мунтазам террорчиликка қарши эканини айтиб келади. Бироқ халқаро ҳамжамият Эронни террорчиликни молялаштирадиган ва қўллаб-қувватлайдиган давлатлар қаторида кўради.
Эроннинг Аҳвоз шаҳрида 22 сентябрь куни бўлиб ўтаётган ҳарбий парадда содир этилган террорда камида 29 одам ҳалок бўлган ва 60 одам жароҳат олган эди.
АҚШ ҳамда БМТ расмийлари ҳужумни кескин қоралади. “Ислом давлати“ экстремистик гуруҳи ҳам, Эрон ҳукуматига қарши Аҳвоз миллий қаршилик ҳаракати ҳам, бирор исбот-далилсиз, ҳужум учун масъулиятни ўз бўйнига олди.