Венгрия ҳукумати Македония собиқ бош вазири Никола Груевскийга сиёсий бошпана берди. Хабарларда айтилишича, Венгрия ҳукумати Груевский ўз ватанида сиёсий тақибларга учраши мумкинлигини эътиборга олган ҳолда унга бошпана берган.
Македония ҳукумати мазкур хабар ортидан Венгрияга 20 ноябрда Груевскийни Македонияга топшириш талаби билан мурожаат қилди. Македон ҳукумати Груевскийни коррупцияда айбламоқда.
Албан полицияси 15 ноябрь куни Никола Груевский Венгрияга Албания орқали венгер дипломатик автомашинасида олиб чиқиб кетилгани тўғрисида баёнот берган эди. Бироқ Венгрия ҳукумати Груевскийнинг Македонияни тарк этишига алоқадорлиги тўғрисидаги барча иддаоларни инкор қилган.
Македония полицияси 12 ноябрда коррупцияда айбланиб, икки йил қамоқ жазосига ҳукм қилинган Груевскийни қидирувга берган эди.
2006-2016 йилларда Македония бош вазири лавозимида ишлаган 48 ёшли Груевский 13 ноябрда Facebook саҳифасида Венгриядан сиёсий бошпана сўраганинини билдирган.