Россия президенти Владимир Путин АҚШ президенти Дональд Трамп билан Аргентинада ўтган “Катта йигирматалик” саммити доирасида қисқа мулоқот қилиб, Украина ва Россия ўртасида Қора денгизда бўлиб ўтган конфликтни муҳокама этганини билдирди.
-Афсуски, биз тўлиқ форматда учрашув ўтказиш имкониятига эга бўлмаяпмиз. Бундай учрашув ўтказиш фурсати етиб келди. Бу президент Дональд Трамп АҚШ ўртача масофага учувчи ядровий қуроллар шартномасидан чиқиш ниятида эканини эълон қилгани ортидан пайдо бўлган стратегик барқарорлик муаммолари билан боғлиқ, -деди Путин 1 декабрда журналистларга берган интервьюсида.
Аввалроқ АҚШ президенти Дональд Трамп Аргентинада ўтаётган «Катта йигирматалик» раҳбарлари саммити доирасида Россия президенти Владимир Путин билан ўтказилиши режаланган учрашувни бекор қилган эди.
Вашингтоннинг билдиришича, бунга Россия томонидан Керчь бўғозида учта украин кемасига ҳужум қилингани ва кемаларнинг экипаж аъзолари билан биргаликда ҳибсга олингани сабаб бўлган.
25 ноябрь куни Украинанинг учта ҳарбий кемаси Керчь бўғозида Россия ҳарбийлари томонидан ўққа тутилган ва қўлга олинган эди. Қўлга олинган 24 нафар денгизчининг ҳар бири Симферопол суди ҳукми билан икки ойданга қамалди.
Мазкур воқеа ортидан Украинада 28 ноябрдан бошлаб 30 кун муддатга ҳарбий ҳолат жорий этилди. Халқаро ҳамжамият Россиядан вазиятни кескинлаштирмасликни ва қўлга олинган денгизчилар ҳамда кемаларни озод қилишни талаб этмоқда.