Вашингтонда 5 декабрь куни АҚШнинг собиқ президенти катта Жорж Бушни сўнгги сафарга кузатиш маросими ўтказилади. Вашингтондаги Миллий кафедрал черковида ўтадиган маросимда собиқ президентлар, хориж давлатларининг расмий вакиллари иштирок этадилар.
Амалдаги президент Дональд Трамп ҳам видолашув маросимида қатнашади. Лекин Бушлар оиласини танқид қилиб келган Дональд Трампга маросим пайтида сўз берилмайди. Бу АҚШда 1973 йилдан бери собиқ президент билан видолашув маросимида амалдаги президентга сўз берилмаган биринчи воқеа бўлади.
Маросимдан сўнг Жорж Бушнинг жасади Хьюстонга олиб кетилади ва у ташкил этган президент кутубхонаси ҳудудидаги мозорга, рафиқаси Барбара Бушнинг олдига дафн этилади.
АҚШнинг собиқ 41- президенти катта Жорж Буш 94 ёшида 30 ноябрь куни оламдан ўтди.
Республикачи катта Жорж Буш 1989-1993 йилларда Оқ уйга раҳбарлик қилган, 1993 йилги сайловда демократ рақиби Билл Клинтонга ютқазганди.
У АҚШга бир муддат президентлик қилган бўлса-да, дунё сиёсатидаги йирик ўзгаришлар - СССРнинг парчаланиши, Форс кўрфазидаги уруш айнан унинг президентлик даврида рўй берган.