Франция президенти Эммануэль Макрон мамлакатда сўнгги ҳафталарда аксилҳукумат намойишлари ва зўравонликлар кучайиб кетгани ортидан 10 декабрда миллатга мурожаат билан чиқади.
Президент маъмуриятининг билдиришича, Макрон кеч соат 8да Елисей саройидан туриб мурожаатни ўқиб эшиттиради.
Мурожаатдан бир неча соат олдин Макрон касаба уюшмалари раҳбарлари ва тадбиркорлар вакиллари билан учрашади.
Францияда ёнилғи солиғи ошгани ва кун кўриш қимматлашганига норозилик тариқасида ўтказилган сўнгги намойишларда 1700 норози қўлга олингани ва юздан ортиқ одам жароҳатлангани хабар қилинди.
АҚШ президенти Дональд Трамп Францияда бундай вазият Вашингтон иқлим ўзгариши бўйича Париж шартномасидан чиққани ортидан юзага келгани тўғрисида Твиттер саҳифасида ёзиб қолдирди. Трампга кўра, АҚШ шартномадан чиқиши Францияда солиқларнинг кўтарилишига сабаб бўлган.
Франция ташқи ишлар вазири Жан-Ив Ле Дриан 9 декабрда Трампнинг бу баёнотини танқид қилди.
-Мен Дональд Трампга президент Эммануэль Макрон айтган гапни айтмоқчиман: Биз Америкадаги сиёсий баҳсларда иштирок этмаётирмиз, шунинг учун сиз ҳам бизнинг баҳсларга аралашманг,- деди Ле Дриан.