Франция президенти Эммануэл Макрон мамлакатда сўнгги ҳафталарда юз берган норозилик намойишлари ортидан энг кам иш ҳаққи миқдорини ойига 100 еврога кўпайтиришга ваъда берди.
10 декабрь куни французларга қилган мурожаатида Макрон Францияда «ижтимоий-иқтисодий фавқулодда ҳолат» эълон қилди.
-Энг кам ойлик иш ҳақи 2019 йилдан бошлаб юз еврога кўтарилади ва бунинг учун иш берувчилардан қўшимча ҳаражат талаб қилинмайди. 2019 йилдан бошлаб ортиқча ишланган вақт учун тўланадиган ҳақдан солиқ ва бошқа тўловлар олинмайди. Молиявий имкониятга эга бўлган барча иш берувчиларни ишчиларга йил охирида мукофот беришга чақираман. Бу мукофотдан ҳеч қандай солиқ ва тўловлар олинмайди,-деди Макрон.
Франция президенти, шунингдек, 2000 евродан кам даромад топадиган пенсионерлардан олинадиган солиқ миқдори оширилмаслигини ҳам айтиб ўтди.
Францияда ёнилғи солиғи ошгани ва кун кўриш қимматлашганига норозилик ноябрь ойининг ўрталаридан бошланган эди. 10 декабргача давом этгани намойишларда зўравонликлар ва полиция билан тўқнашувлар ҳам юз берган.
Бунинг ортидан Макрон 5 декабрда нарх оширилиши тўғрисидаги қарорни бекор қилишга мажбур бўлган эди.
Молия вазири Бруно Ле Маре мазкур намойишлар Франция иқтисоди учун «фожеа» бўлганини айтди.