Санкт-Петербургда Ўзбекистоннинг бир фуқароси одам ўғирлашда, яна бир ўзбекистонлик эса наркотик ташишда айбланиб қамоққа олинди.
Петербург прокуратураси расмий сайтида билдирилишича, 2018 йилнинг июль ойида Ўзбекистон фуқароси ўз севгилиси билан бузилган муносабатларни қайта тиклашга ҳаракат қилган. Лекин қиз бунга кўнмаганидан сўнг йигит бир неча дўсти билан уни автомашинага мажбурлаб ўтқазиб, олиб қочишга ҳаракат қилади. Ўғирлаш пайтида қизнинг турли жойларига камида 5 марта мушт урилади.
Йигит дўстлари билан қизни ўғирлаб кетаётган пайтда йўл полицияси томонидан қўлга олинган.
11 декабрь куни прокуратура ўзбекистонлик йигитга нисбатан айбловни тасдиқлади ва ишни судга топширди.
Санкт-Петербургнинг Пулково аэропортида эса 11 декабрь куни божхоначилар Тошкентга 287 контейнерда 500 грамм наша олиб кетишга ҳаракат қилган ўзбекистонлик йўловчини қўлга олди.
Расмий маълумотда айтилишича, рентген текшируви пайтида йўловчининг ошқозонида наша солинган 287та контейнер борлиги аниқланган.
Ўзбекистонликка нисбатан Жиноят кодексининг “катта миқдорда наркотик контрабандаси билан шуғулланиш” моддаси асосида жиноят иши қўзғатилди.