Қозоғистон Мустақиллигининг 27 йиллиги нишонланаётган 16 декабрь куни 2011 ва 1986 йилги қонли воқеаларни хотирлаш тадбирини ўтказмоқчи бўлган ҳуқуқ фаоллари Олмаотада полиция томонидан қўлга олинди.
“Ар. Рух . Хак” ҳуқуқ ташкилоти раҳбари Бахитжан Торегожин Озодлик радиоси қозоқ хизматига айрим ҳуқуқ фаоллари тадбир ўтказиладиган жойга етиб бормасидан туриб, уйдан чиқаётган пайтда полиция бўлимига олиб кетилганини айтди.
Шу куни Ўрол шаҳрида ҳам «Уральская неделя» газетаси журналистлари Мария Мельникова ва Раул Упоров қўлга олинди. «Адил соз» нодавлат ташкилотининг билдиришича, газетанинг хўжайини Тамара Эслиямова ва бош муҳаррири Лукпан Ахмедияровларни полиция уйидан чиқармай қўйган.
2011 йилнинг 16 декабрида қозоқ полицияси Жанўзенда норозилик намойишига чиққан нефтчиларни тарқатиш пайтида 16 нафар норозини отиб ўлдирган эди.
1986 йилнинг декабрида эса Олмаотада қозоқ ёшлари Кремль республикани бошқаришга миллати рус Колбинни олиб келиб қўйганига норозилик билдириб намойишга чиққан эди.
Қозоғистон ССР Компартияси ўша вақтда тайёрлаган ҳисоботда айтилишича, кейинчалик Желтўқсон деб номланган бу исёнда 11 минг киши иштирок этган. Улардан 860 киши қамоққа олинган, бир киши ўлган.
СССР тарқагандан сўнг эълон қилинган маълумотларга қараганда эса бу ғалаёнга 40 мингтагача одам чиққан, 5 мингтагача киши қамоққа олинган ва озодликдан маҳрум қилинган.