Қирғизистон парламенти - Жўғўрқу Кенеш вице-спикери лавозимига Қирғизистон социал-демократик партиясидан (ҚСДП) Аида Қасималиева сайланди.
Бу ҳақда хабар қилган Азаттиқ радиосига кўра, Қасималиеванинг номзодини депутатларнинг 91 нафари қўллаган, 16 депутат қарши овоз берган.
14 декабрда ҚСДП фракцияси навбатдан ташқари мажлисга йиғилиб, вице-спикер лавозимида ишлаган Асел Қодрановани эгаллаб турган лавозимидан бўшатган эди.
Жўғўрқу Кенеш спикерининг икки ўринбосари бор.
ҚСДП Қирғизистон экс-президенти Алмазбек Атамбаевнинг партияси.
Аида Қасималиева Азаттиқ радиосида (Озод Европа/Озодлик радиосининг Қирғиз хизмати) 2004 йилдан 2008 йилгача ҳамда 2010 йилдан 2014 йилгача ишлаган. Оилали, бир фарзанди бор.