Британиянинг Манчестер шаҳар полицияси метро станциясида одамларга пичоқ билан ҳужум қилган шахс террорчи эканини билдирди.
31 декабрь куни кечқурун Манчестер метросида ҳужумчи учта одамни, жумладан, бир полициячини пичоқлаб яралаган эди. Яраланганлардан икки нафарининг аҳволи оғир экани айтилмоқда.
-Ўтган тунда Янги йилни нишонлаётган одамларга қилинган даҳшатли ҳужумга гувоҳ бўлдик. Бу воқеа жуда кўп одамларни ташвишга солганини биламан. Чунки бу воқеа 2017 йилнинг 22 майида террор ҳужуми содир этилган жойга жуда яқин бўлган ҳудудда юз берди,-деди полиция расмийси Ян Хопкинс.
Ҳужумчи қўлга олинган. Полицияга кўра, у ҳужум пайтида «Аллоҳу Акбар», деб қичқирган.
2017 йилнинг 22 майида Манчестерда содир этилган террорда 22 одам ҳалок бўлган, 60га яқин одам яраланган эди.