Россия президенти Владимир Путин Туркия президенти Режеп Таййип Эрдоған билан АҚШнинг Суриядан ўз қўшинларини олиб чиқиб кетиш режасини муҳокама қилиш учун учрашади. Ҳозирда Сурияда ҳар икки давлатнинг ҳарбийлари бор.
6 январь куни Туркиянинг Anadolu давлат ахборот агентлиги икки етакчи жорий ойда учрашишини, лекин учрашув куни ҳали аниқ белгиланмаганини хабар қилди.
Кремль матбуот котиби Дмитрий Песков икки етакчи яқин кунларда учрашишини тасдиқлади.
Путин ва Эрдоған охирги марта 1 декабрь куни Буэнос-Айресда “катта йигирмалик” саммитида учрашган эди.
Декабрь охирида эса икки давлат ташқи ишлар ҳамда мудофаа вазирлари Суриядаги вазиятни муҳокама қилиш учун Москвада учрашди.
Сурияда етти йилдан буён қонли уруш давом этмоқда. Россия ва Эрон президент Башар Асадни дастаклаб келади. АҚШ ва Туркия эса ҳукуматга қарши бошқа-бошқа гуруҳларни қўллаб келади.
АҚШ миллий хавфсизлик маслаҳатчиси Жон Болтон АҚШ режаларини 8 январь куни Туркия мудофаа вазири Ҳулуси Акар билан муҳокама қилишини маълум қилди. Болтон Исроилда ўтказган учрашувлари давомида Туркия курд жангчилари хавфсизлигига кафолат бериши АҚШнинг Суриядан чиқиб кетиши шартларидан бири эканлигини айтди.