АҚШнинг Apple ширкати янги айфонларни ишлаб чиқаришни 10 фоизга озайтиради. Nikkei нашрининг билдиришича, гап Apple XS Max, XS ва XR айфонларини ишлаб чиқаришни қисқартириши ҳақида бормоқда. 2018 йилнинг ноябрида ҳам ширкат iPhone XR ишлаб чиқаришни камайтирган эди.
Январь ойи бошларида Apple сўнгги 16 йил ичида биринчи марта ширкат даромадлари озайиши ҳақидаги прогнозни эълон қилган. Мазкур ҳисоботда таъкидланишича, 2019 йилнинг биринчи чорагида ҳозирда 93 миллард доллар бўлган даромад 84 миллиард долларга тушиб қолиши мумкин.
Бу ҳисобот эълон қилинган куни ширкат акциялари 9 фоизга арзонлаб кетди. Умуман олганда, сўнгги уч ой ичида Apple акциялари 30 фоизга арзонлади.
Ўтган йилнинг августида Apple ширкати 1 триллион доллар капитализация билан дунёнинг энг қиммат ширкати деб эълон қилинган эди. Бугунги кунда эса бу ширкат жаҳонда 4-ўринга тушиб қолган.
Apple ширкатининг қиймати тушиб кетганига долларнинг мустаҳкамланиши ва АҚШ-Хитой савдо уруши сабаб бўлгани айтилади. Ширкат заводларининг асосий қисми Хитойда жойлашган. Бундан ташқари Хитой иқтисодиётининг ўсиши ҳам секинлагани оқибатида Apple молиявий муаммоларга дуч келди.
Хабарда айтилишича, Хитой иқтисодиёти ўсишининг секинлагани Apple’нинг асосий рақиби Samsung ширкатига ҳам салбий таъсир қилди. 2018 йилнинг сўнгги уч ойида бу ширкат акциялари деярли 30 фоизга арзонлаган. Samsung аввал режалаштирилганидан 4,5 миллиард доллар кам фойда кўрилишини билдирган.