Британия парламенти15 январь куни кечқурун мамлакатнинг Европа Иттифоқидан чиқиши юзасидан Брюсселда эришилган шартномага қарши овоз берди. Бош вазир Тереза Мэй Европа Иттифоқи раҳбарлари билан музокаралардан сўнг имзолаган мазкур келишувда Британиянинг иттифоқдан чиқиш тартиби белгилаб берилган эди.
Ҳужжатга қарши парламентнинг 432 депутати овоз берди. 202 депутат эса шартномани маъқуллади. Парламент қарори эълон қилиниши биланоқ мухолифат лидери Жереми Корбин ҳукуматга ишончсизлик билдириш масаласини овозга қўйиш таклифини киритди.
Аввалроқ Тереза Мэй: "Европа Иттифоқи билан эришилган шартнома парламент томонидан тасдиқланмаса, унда 16 январь куни ҳукуматга ишончсизлик билдириш масаласи кўриб чиқилиши керак", деб айтган эди. Мэй шартномани Британия манфаатларига тўлиқ жавоб бера оладиган ҳужжат деб баҳолаган.
-Бу келишувга қарши овоз берилиши ортидан қандай оқибатлар келиб чиқиши тобора аниқлашиб бораяпти. Бу келишув бўлмаганида хавфсизлик бўйича ҳамкорлик ҳам, хориждаги британияликлар учун муайян кафолатлар ҳам, тадбиркорлар ва ишчиларнинг ўзига ишончи ҳам йўқ бўлар эди, - деди Тереза Мэй.
2019 йилнинг 29 март куни Британия расман ЕИдан чиқиши лозим. Бу чиқиш шартлари белгиланган келишувнинг муваффақиятсизликка учраши¸ таҳлилчилар фикрича¸ Британия-ЕИ муносабатлари¸ хусусан¸ Британия иқтисодида хаос бошланишига олиб келиши мумкин.