Навоий вилоятининг Кармана туманида туғилган, кейинчалик Буюк Британияда таҳсил олиб, у ерда ишини давом эттираётган 35 яшар молиячи Назиржон Жўраев Навоий вилояти ҳокимига маслаҳатчи бўлди.
Навоий вилоят ҳокимлиги сайтида берилган хабарга кўра, Жўраев туғилган вилоятига камида 2 та халқаро банкнинг инвестициясини жалб қилиш, Германиядаги халқаро университет филиалини очиш ва қатор инвестицион лойиҳалар бўйича таклифини киритган.
"Ўзбекистонда мен каби ёш мутахассисларнинг ҳар томонлама қўллаб-қувватланаётганини кўриб, туғилиб ўсган юртимга қайтиб, хизмат қилишга қарор қилдим. Вилоят ҳокимининг таклифидан руҳланиб, ғайрат ва шижоат билан ишга киришмоқдаман... Хорижда ўрганганларимни ҳаётда қўллаш имкониятига эга бўлганим учун Президентимиздан жуда миннатдорман", дея иқтибос келтиради ҳокмилик сайти, Жўраевдан.
Хабарда келтирилишича, Жўраев 1983 йилда Кармана туманида туғилган. Навоий Кончилик институтини битирган.
2007 йилда Лондон Бухгалтерия ва молия коллежини тамомлагач, 2011 йилгача Англияда “Oceanic Village LTD” компаниясида менеджер, 2018 йилгача “Jones Lang Lasalle” компаниясида бизнес иншоотларини бошқариш бўйича менеджер ёрдамчиси бўлиб ишлаган.
Шунингдек, унинг Лондон қимматли қоғозлар бозорида тажриба тўплагани, бу орада Англия Раскин университетининг магистратура босқичида ҳам ўқигани айтилган.