Афғонистоннинг Вардақ вилоятидаги Майдоншаҳр шаҳридаги ҳарбий тайёргарлик комплексига 21 январда қилинган ҳужум оқибатида ўнлаб одамлар ҳалок бўлди.
Reuters агентлигининг Мудофаа вазирлигидаги манбага таяниб хабар беришича, ҳужумда камида 126 одам ҳалок бўлган. Расмийлар эса камида 12 киши ўлганини ва 20 одам яраланганини билдирмоқда.
Ҳужум учун масъулиятни ўз зиммасига олган Толибон эса камида 190 нафар афғон ҳарбийси ўлдирилганини иддао қилаётир.
Агентликларнинг билдиришларича, ҳалок бўлганларнинг аниқ сони юзасидан тушунтириш бериш сўровини ҳукумат рад этди.
Хабарда айтилишича, 21 январь куни ҳарбий тайёргарлик комплексида худкуш ўзини бомба ўрнатилган машинада портлатиб юборган. Шундан сўнг Толибоннинг уч жанггариси комплекс ходимларига қарата ўқ ота бошлаган. Жанггариларнинг барчаси отишма пайтида ўлдирилган.