Европа Иттифоқига аъзо бўлган давлатларнинг ярмидан кўпроғи 4 февраль куни мухолифат лидери ва парламент раиси Хуан Гуайдони Венесуэла президенти сифатида тан олди.
Британия, Франция, Германия ва бошқа давлатлар амалдаги президент Николас Мадурога қайта сайлов ўтказиш тўғрисида фармон чиқаришга саккиз кун муҳлат берган эди. Бу муҳлат якунлангунича бундай фармон эълон қилинмаса, Европа Иттифоқи Хуан Гуайдони президент сифатида тан олишини билдирган. 4 февраль куни мана шу муҳлат битди, аммо Мадуро қайта сайлов ўтказилишини эълон қилмади.
Январь ойида Венесуэлада 2018 йилнинг якунида овозларни сохталаштириш эвазига иккинчи марта президентликда қолгани айтилаëтган Мадурога қарши оммавий норозилик намойишлари бошланиб кетган эди.
Бу намойишлар ортидан 23 январь куни Хуан Гуайдо ўзини вақтинча президент деб эълон қилди. Жаҳоннинг кўплаб етакчи давлатлари Гуайдо ҳокимиятни тан олди. Россия¸ Хитой ва Туркия Мадурони қўллаб қувватламоқда.