Президент Дональд Трамп АҚШ ҳарбийлари Яқин Шарқда узоқ вақтдан бери жанговар ҳаракатларни олиб бораётганидан афсус билдирди ҳамда Афғонистондаги тинчлик ўрнатиш бўйича музокараларни тезлатишга ваъда берди.
6 февраль куни Конгрессга қилган мурожаатида Трамп сўнгги 19 йилда Афғонистон ва Ироқда 7 минг АҚШ ҳарбийси ҳалок бўлгани ва 52 минг аскар яраланганини айтди.
Трампга кўра, АҚШ Яқин Шарқда 7 триллион доллар маблағ ишлатган.
“Президентликка номзод сифатида мен янгича ёндашувни ваъда қилган эдим. Буюк халқлар мунтазам равишда охири йўқ урушларни олиб бормайдилар”, деди Трамп.
АҚШ президентига кўра, Вашингтон расмийлари Афғонистонда қатор гуруҳлар, жумладан, Толибон билан тинчлик ўрнатиш юзасидан конструктив музокаралар олиб бормоқда.
“Биз келишувга эришамизми ёки йўқми, билмайман. Лекин ҳар ҳолда йигирма йил давом этган урушдан сўнг ҳеч бўлмаганда тинчлик ўрнатишга уриниб кўриш вақти етиб келди”, деди Трамп.
АҚШ президенти Дональд Трамп 6 февраль куни Тошкент вақти билан соат 7да Конгрессга мурожаатини бошлади.
Унинг маърузаси Конгрессдаги демократлар билан мунозаралари чуқурлашиб бораётган паллага тўғри келмоқда.
Трамп маърузадан бир неча кун олдин ҳукуматнинг АҚШ тарихидаги энг узоқ – 35 кунлик шатдауни тугаган эди.
Шатдаунга Трампнинг АҚШ билан Мексика ўртасидаги чегарага девор тиклашга маблағ ажратиш талабини ҳам Намоёндалар палатаси, ҳам Конгрессдаги демократлар рад этгани сабаб бўлди.
Президент айни талабини ноқонуний иммиграция ва наркотикларнинг мамлакатга кириб келиши йўлини тўсиш истаги билан изоҳламоқда.
Лекин шатдаунни вақтинча бекор қилиш бўйича келишув муддати 15 февралда тугайди. Трамп Конгрессга, агар девор учун 5,7 миллиард доллар ажратмаса, фавқулодда вазият жорий этиш билан таҳдид қилди.