Македония ҳукумати 12 февраль куни Брюсселда НАТОга аъзо давлатлар мудофаа вазирлари саммити очилиши арафасида мамлакат номи Шимолий Македония деб ўзгартирилганини расман эълон қилди. Мамлакат номини ўзгартириш унинг НАТО ва Европа Иттифоқига қўшилиши йўлидаги асосий талаблардан бири бўлиб келаётганди.
12 февралда НАТО саммитини очган ташкилот бош котиби Йенс Столтенберг:
-Мазкур учрашувда биз биринчи марта Скопьелик ҳамкасбимизни – Шимолий Македония мудофаа вазири Радмил Секеринскуни қутлаётганимиздан мамнун эканимизни айтишга рухсат бергайсиз. Шимолий Македониянинг келажаги энди НАТО билан биргадир,-деб айтди.
НАТО 6 февраль куни Македонияни ташкилотга қабул қилиш юзасидан келишувни имзолади. Номи Шимолий Македония деб ўзгартирилган мазкур давлат НАТОнинг 30-аъзоси бўлди.
Македония билан Греция ўртасида 2018 йилнинг июнида эришилган келишувга биноан, Македония ўз номини ўзгартириши унинг НАТО ва Европа Иттифоқига аъзо бўлиши учун йўл очди.
Греция билан узоқ йиллар давом этган музокаралардан сўнг Македония номи Шимолий Македония деб ўзгартирилиши тўғрисидаги муросага эришилган эди.
Грециянинг бир вилояти ҳам Македония деб аталиши туфайли, Афина келажакда ҳудудий ихтилоф чиқишининг олдини олиш мақсадида 1991 йилдан бери Македониядан ўз номини алмаштиришни талаб қилиб келаётган эди.