Россия президенти Владимир Путин, Эрон президенти Ҳасан Руҳоний ва Туркия президенти Режеп Таййип Эрдўғон 14 февраль куни Россиянинг Сочи шаҳрида учрашиб, Суриядаги вазиятни муҳокама қилади.
Кремлнинг маълум қилишича, уч етакчи Сурия бўйича узоқ муддатли ечим топиш бўйича кейинги қадамларни муҳокама қилади.
Хусусан, Россия ташқи ишлар вазири Сергей Лавров президентлар Сурияда янги конституция лойиҳасини ишлаб чиқиш учун қўмита тузишни муҳокама қилишини айтди.
Россия, Эрон ва Туркия Сурияда етти йилдан бери тинчимаётган урушни сиёсий йўл билан тугатиш тарафдори эканлигини изҳор қилган. Москва ва Теҳрон Сурия президенти Башар Асадни қўллаб келади. АҚШ ва Туркия эса турли исёнчи гуруҳларни қўллаб келади.
Суриядаги жангларни тўхтатиш мақсадида кейинги йилларда ўтказилган қатор музокаралардан натижа чиқмади. Турли ҳисобларга кўра, Сурияда 2011 йилдан бери 400 мингдан ошиқ одам ҳалок бўлган, миллионлаб одам ўз уйини тарк этишга мажбур бўлган.
АҚШ президенти Дональд Трамп Суриядаги "Ислом давлати" жангарилари қарийб битгани, 2 мингдан ортиқ америкалик ҳарбий бу давлатдан олиб чиқилишини маълум қилган.