Таниқли рус сиёсатшуноси ва медиаменеджери Игорь Малашенко Испанияда ўлик ҳолда топилди. "Коммерсант" газетаси 25 февралда ўз манбаларига таянган ҳолда, Малашенко ўз жонига қасд қилган бўлиши эҳтимолдан ҳоли эмаслигини билдирди.
Хабарда айтилишича, сўнгги пайтларда Малашенко собиқ хотини Елена Пивоварова билан судлашаётган эди. Пивоварова собиқ эри мулкининг 80 фоизи ўзига берилишини талаб қилиб, судга мурожаат қилган.
Аввалроқ Малашенко собиқ хотини билан жанжалдан сўнг оғир аҳволда касалхонага ётқизилгани айтилган.
Игорь Малашенко НТВ телекомпаниясининг асосчиларидан бири. У турли йилларда Россия давлат телеканалига раҳбарлик қилган, Россиянинг собиқ президенти Борис Ельцинга сайлов пайтида бош маслаҳатчи бўлган. Бундан ташқари у RTVI телеканали бош директори лавозимида ишлаган.
2018 йилда Малашенко Россия президентлигига ўз номзодини кўрсатган Ксения Собчак сайлов штабининг бошлиғи бўлган.