Оқ уй АҚШ Намоёндалар палатасининг демократ аъзолари президент Дональд Трампнинг ҳамкорлари ва шерикларидан ўнлаб ҳужжатни сўраганини кескин танқид қилди.
4 март куни Оқ уй матбуот котиби Сара Сандерс демократларнинг бу ҳаракатини “шармандали ва ҳақоратомуз” дея таърифлади.
Ўша куни демократлар бошқарувида Вакиллар палатаси юридик қўмитаси 81 шахс ва ташкилотдан маълумот сўраб, мурожаат қилган эди.
Қўмита раиси ҳамда Оқ уйнинг Россия билан алоқасини тергов қилаётган ишчи гуруҳ етакчиси вакил Жеррольд Надлер Оқ уй ўз ваколатларини суистеъмол қилаётганини текшириш Конгресс вазифаларидан бири эканини айтди.
Сандерс эса, демократлар икки йилдан бери Россия билан Оқ уйнинг тил бириктиргани ҳақида бонг уриб келаётган бўлишига қарамасдан, ҳеч бир натижага эриша олмаганини таъкидлади.
Қўмита алоқага чиққан шахслар орасида рус миллиардери Виктор Вексельберг, грузиялик-америкалик тадбиркор Иракли Кавеладзе ҳамда рус олигархи Евгений Пригожинга алоқадор икки ширкат бор. Қолаверса, демократлар россиялик-америкалик лоббичи Ринат Ахметшин, Вексельбергнинг америкалик қариндоши Эндрю Интратер ҳамда Трамп билан ишлашган кўчмас мулк тадбиркори Феликс Сатерга ҳам мактуб юборган.
Қўмитанинг маълум қилишича, бу шахслардан маълумотларни кўнгилли тарзда топшириш сўралган. Аммо қўмита кўзлаган мақсадига эриша олмаса, судга чақирув қоғозини ҳам юбориши мумкин.