АҚШ судьяси Боснияда туғилган аёлнинг фуқаролигини бекор қилди. Бунга Самми Расема Етисеннинг собиқ Югославияда 1990 йилларда содир бўлган урушдаги ролини яширгани сабаб бўлди.
Адлия вазирлигининг билдиришича, судья Марко Ҳернандез Етисенни 1 март куни АҚШ фуқаролигидан жудо қилган.
АҚШ расмийларига кўра, Етисен Босния-Герцеговинанинг 1993 йилда Трусина қишлоғига ҳужум қилган ҳарбий бўлимининг аъзоси бўлган.
Трусина қирғини ўлароқ маълум бўлган ҳужумда қишлоқда яшаб келган босниялик этник хорватлар нишонга олинган.
Етисен АҚШга қочқин ўлароқ қабул қилинган ва 2002 йилда АҚШ фуқаролигини олган.
Етисен ва яна бир босниялик шахс Эдин Дзеконинг Трусина қирғинидаги роли ҳақидаги иддаолар тарқалиши ортидан улар Боснияга экстрадиция қилинган, Босния уруш суди уларни айбдор деб топган эди.
Етисен расмийлар билан ҳамкорлик қилган ва Дзекога қарши кўрсатма берган. Етисен 5 ярим йил қамоқ муддатини ўтаб бўлгач, АҚШга қайтиб борган.
Босния урушида 100 мингга яқин одам ҳалок бўлган, 2,6 миллион одам ўз уйини тарк этишга мажбур бўлган эди.