Америкадаги Netflix видео сервиси Нобель мукофоти лауреати Габриел Гарсиа Маркеснинг машҳур “Ёлғизликнинг юз йили” романи асосида сериал суратга олинишини маълум қилди.
1967 йилда ёзилган роман асосида биринчи марта бадиий фильм суратга олинади. Бунга қадар 2014 йилда вафот этган Маркеснинг оиласи асар асосида фильм суратга олинишига рухсат бермай келаётган эди.
Айтилишича, адибнинг ўғиллари Родриго ва Гонсало сериалнинг бош продюсерлари бўлиши кутилмоқда. Сериал испан тилида суратга олинади. Тасвирга олиш жараёни асосан Колумбияда амалга оширилади.
“Отамиз ўн йиллардан бери “Ёлғизликннинг юз йили” асосида фильм суратга олишга рухсат бермай келган. У кино ўз асарини экранлаштириш учун жуда қисқа жанр деб ҳисоблар эди. У роман асосида фақат испан тилида кино олиш мумкин, деган нуқтаи назарда эди”, - деб билдирди Родриго Гарсиа Variety нашрига берган интервьюсида.
Габриал Гарсиа Маркеснинг “Ёлғизликннинг юз йили” романи дунёнинг 46 тилига таржима қилинган. 1967 йилдан шу кунгача бу романнинг 50 миллиондан кўпроқ нусхаси сотилган.