Amnesty International ташкилоти чеченистонлик ҳуқуқ фаоли Оюб Титиевни озодликка чиқариш чақириқларини такрорлади.
“Мемориал” ташкилотининг Грознийдаги бўлимига раҳбарлик қилиб келган Титиев ўтган йил бошида наркотик сақлаганликда айбланиб, қўлга олинган эди.
11 март куни Титиев иши бўйича якуний суд эшитувлари бошланди. Айбловчи Милана Байтаева Шали шаҳри судидан Титиевни тўрт йил қамоқ жазосига ҳукм қилишни сўраган.
Amnesty International ташкилотининг Россия бўйича тадқиқотчиси Наталья Прилуцкая Титиев айбсизлигини кўрсатувчи далиллар борлигига қарамасдан, уни айбдор деб топишларини кутиш мумкинлигини айтди.
Титиев ва унинг тарафдорлари полиция атайин унинг машинасига гиёҳванд модда ташлаб қўйганини айтиб келади.
Европа Иттифоқига аъзо бир неча давлат, АҚШ ҳамда Европа Парламенти Тетиевнинг қўлга олинганини кескин қоралаб келади.
Европа Кенгашининг парламент ассамблеяси 2018 йил октябрда Титиевни ҳуқуқ фаолларига бериладиган нуфузли Вацлав Гавел мукофоти билан тақдирлаган.