12 март куни кечқурун Британия парламенти мамлакатнинг Европа Иттифоқидан чиқишига оид сўнгги таҳрирдаги келишувни овозга қўяди.
Бугунги мажлисдаги чиқишида Бош вазир Тереза Мэй, депутатлар овозга қўйилган келишув матнини маъқулламаса¸ Брекзитнинг амалга ошмай қолишини билдирди. Мэй¸ Британиянинг ЕИдан чиқиши бўйича умухалқ референдуми хулосасини ҳурмат қилувчи депутатларни¸ келишувни ëқлаб овоз беришга чақирди.
Овозга қўйиш жараëнининг Лондон вақти билан кечи саот 8 да бошланиши кутилмоқда. Агар депутатлар келишувни рад этса¸ чоршанба куни парламентда Британиянинг 29 март куни иттифоқ таркибидан келишувсиз чиқиш-чиқмаслиги масаласи овозга қўйилади.
Агар депутатлар ЕИдан келишувсиз чиқиш эҳтимолини ҳам рад этса¸ унда пайшанба куни Брекзит муддатини яна уч ойга кечиктириш масаласини овозга қўяди.
ЕИ бундай уч ойлик кечикишга фақат бир марта рухсат берилишидан огоҳлантирган. Бу эҳтимолларнинг ҳаммаси натижасиз тугаса¸ Британия ЕИда қолиш-қолмаслик масаласида такрор референдум ўтказишга мажбур бўлиши мумкин.