Венесуэла президенти Николас Мадуро “Боливар ва Чавес ватанини ҳар қандай таҳдиддан ҳимоя қилиш мақсадида” ҳукумат тўлиқ реструктуризация қилиш учун ҳукуматни истеъфога чиқишга чақирди.
Бу ҳақда Венесуэла вице-президенти Делси ўз твиттерида ёзди. Ҳозирча Мадуронинг ўзи бу ҳақда ҳеч қандай расмий баёнот бергани йўқ.
17 март куни Венесуэланинг Meganálisis компанияси томонидан ўтказилган ижтимоий сўров натижалари Венесуэла аҳолисининг 89 фоизи мамлакат президенти ва ҳукумати истеъфога чиқишини хоҳлашини кўрсатган.
Венесуэла айни пайтда чуқур сиёсий ва иқтисодий инқирозни бошдан кечиряпти. 2018 йилда мамлакатда инфляция даражаси бир миллион фоизлик кўрсаткичдан ошиб кетди. Аҳоли озиқ-овқат ва дори-дармон танқислигига дучор бўлган. Ўтган ҳафтада мамлакат ҳудудининг катта қисми электр станцияларидаги авариялар туфайли электр қувватисиз қолган.
Венесуэладаги оммавий намойишлар январнинг бошида Николас Мадуро иккинчи муддатга давлат раҳбарлигига киришган заҳотиёқ бошланган эди. Ўшанда Венесуэла парламенти раҳбари Хуан Гуайдо ўзини президент лавозимини вақтинча бажарувчи этиб эълон қилган ва мустақил сайловлар ўтказилишини талаб этиб чиққанди. Гуайдони АҚШ, Лотин Америкасининг кўплаб давлатлари, Европа Иттифоқининг аксарият мамлакатлари қўллаб-қувватлади. Ҳозирги президент Николас Мадурони эса Россия, Хитой, Куба ва Мексика қонуний деб ҳисобламоқда.
Ўтган шанба куни Гуайдо ҳудудларда Мадурони ҳокимиятдан четлаштириш йўлидаги курашни қўллаб-қувватлашларига эришиш учун мамлакат бўйлаб сафарга жўнаган. Гуайдо турнеси Каракасда улкан норозилик намойиши билан якунланиши керак. Унда мухолифат етакчиси Мадуродан “халққа ҳокимиятни қайтариш” ва президент саройини бўшатиб қўйишни талаб қилишга ваъда берган.