Президент Владимир Путин Қрим ярим оролининг Россияга «қўшиб олиниши»нинг 5 йиллиги муносабати билан Симферополда сўзлаган нутқида, Қрим Россия таркибида ривожланган ҳудудга айланаётганини иддао қилди:
-Россия ўз қучоғини очиб, сизларни кўп миллатли оиласига хурсандчилик билан қабул қилди. Биз сўнгги беш йилда кўп ишларни амалга оширдик, лекин яна кўпроқ ишларни қилишимиз керак. Айни пайтда ривожланиш учун зарур бўлган асосий шароитлар яратилди, биз бошқаришда давом этамиз, барча муаммолар ва олдинга қўйилган мақсадларга етишамиз, чунки бу ишларни амалга ошириш учун зарур бўлган асосий омил бизнинг бирдамлигимиздир,-деди Путин.
Украина ҳамда ғарб давлатлари Россия Украинанинг Қрим минтақасини қўшиб олганини “ноқонуний аннексия” ўлароқ кескин қоралаб, мамлакатга қарши санкция жорий қилиб келади.
2014 йилнинг 18 мартида Путин Украинанинг Қрим минтақаси Россияга қайтарилгани ҳақидаги келишувни имзолаган. Бундан олдин Россия кучлари Қримни эгаллаб олган, яриморолда халқаро ҳамжамият тан олмаган референдум ўтказилган эди.
15 март куни АҚШ, ЕИ ҳамда Канада Россиянинг Украинадаги агрессиясига жавобан ўндан ошиқ расмийга қарши янги санкция жорий қилди.
Украина ҳукумати қўшинлари 2014 йилдан бери мамлакат шарқида Россия дастаклаб келаётган айирмачиларга қарши курашиб келади. Тўқнашувларда бугунга қадар 13 мингга яқин одам ҳалок бўлган.