– Мана шундай файзли, шодиёна айёмда барча шаҳар ва туманларда, қишлоқ ва овулларда Наврўз сайлини ўтказаётган барча-барча юртдошларимизга юксак ҳурматим ва энг эзгу тилакларимни изҳор этаман. Ҳаётингиз баҳор тонгидек тиниқ, бахтли ва фаровон бўлсин! Шарқона Янги йилимиз – Наврўзи оламнинг қадами қутлуғ ва баракали келсин, – деди президент Мирзиёев Наврўз муносабати билан Тошкентда ўтказилган тадбирда қилган чиқиши чоғида.
Тадбир 21 март куни “Humo Arena” мажмуасида бўлиб ўтди.
Пойтахт Тошкенда жорий йилги Наврўз сайллари 21 мартдан 24 мартгача давом этади. Бу ҳақда Тошкент шаҳар ҳокимлиги 20 март куни маълум қилди.
21 март куни бошланадиган сайил доирасида мумтоз ва замонавий мусиқа ихлосмандлари учун концертлар, қўргазмалар, миллий ўйинлар ва спорт мусобақалари бўлиб ўтади.
Тошкент шаҳрида Humo Arena кўп тармоқли муз саройининг тантанали очилиш маросими 15 март куни бўлиб ўтган эди.