Венесуэлалик журналистлар 24 март куни Каракас аэропортига юк ва 100 чоғли ҳарбий билан Россиянинг Ил-62 ва Ан-124 русумли учоқлари учиб келганини хабар қилдилар.
Россия Мудофаа вазирлиги ва Ташқи ишлар вазирлиги бу борада расмий баёнот берганлари йўқ, бироқ Каракасдаги дипломатлардан бири РИА Новости нашрига ичида рус ҳарбийлари бўлган учоқлар Венесуэлага келганига оид хабарнинг тўғрилигини тасдиқлади.
Манбага кўра, россияликлар Каракасга икки томонлама маслаҳатлашувларда иштирок этиш учун келганлар. Дипломат бу ҳодиса атрофида “ҳеч қанақа сирлилик йўқ”лигини, чунки ҳодиса Россия ва Венесуэла ўртасида кўп йиллар олдин имзоланган шартномаларни амалга ошириш билан бевосита боғлиқлигини айтган.
Бу маълумотни Associated Press агентлигига исми ошкор этилмаган венесуэлалик мансабдор ҳам тасдиқлаган. У россиялик ҳарбийлар жиҳозларга техник хизмат кўрсатиш, шунингдек, машқлар ва стратегияни муҳокама қилиш учун келганларини билдирган.
Аввалроқ тармоқда Россия Мудофаа вазирлигининг икки учоғи Венесуэла пойтахти Каракас аэропортига келгани акс этган фотосуратлар ва видео пайдо бўлганди.
Венесуэла оммавий ахборот воситаларининг хабар қилишича, икки учоқда 99 нафар россиялик ҳарбий учиб келган. Шунингдек, учоқлар 35 тонна юк олиб келганлар.
Flightradar24 сайти маълумотларига кўра, Ил-62 ва Ан-124 учоқлари Каракасга Россиядаги Чкаловский аэродромидан йўлга чиққан. Йўлда бу учоқлар Сурияда қўниб ўтган.
Бу учоқларнинг ҳар иккиси олдин ҳам Венесуэлага келган, бироқ улар нима ёки кимни ташигани ҳақида ҳеч қанақа маълумот берилмаган.