23 кишидан иборат Саидовлар оиласи ўтган йил баҳоридан бери Душанбе марказида ўзлари қуриб олган чодирда яшаб келаяпти. Улар ғанимларнинг ҳийла-найранглари туфайли ўз уйлари ва тўртта квартирасидан айрилганлар.
Хонадон бошлиғи Маҳмурод Саидовнинг айтишича, у нафақат ўз уйидан, ўғиллари, келинлари ва набиралари яшаётган тўртта квартирадан ҳам маҳрум бўлганини айтган. Унга кўра, рафиқасининг узоқ қариндошлари аввал йўқолган кўчмас мулк ҳужжатларини қайта тиклаб, тураржойларнинг асл эгалари исм-шарифларини ўзлариникига алмаштириб, хусусий мулкни банкка гаровга қўйишган.
Маҳмурод уй ўзларига тегишли эмаслигини банк ходимлари гўё тўланмаган кредитни сўраб келганидан сўнг билиб қолган. Ҳозирда оила чодирда истиқомат қилган ҳолда тергов натижасини кутмоқда.
Маҳмурод чодирни ўғиллари билан ўзларининг собиқ уйлари яқинига ўрнатган. Чодир аёллар ва эркаклар учун икки қисмга бўлинган. Эркаклар қисмида иситиш печкаси йўқ. Улар бу ерда галма-галдан қишки кийимларда ётишади. Аёллар томони эса илиқроқ, у ерда ёритиш воситалари, ихчам печка, стол ва ўтирғичлар бор. Бу ерда аёллар овқат тайёрлашади, болаларини овқатлантиришади, кир ювишади.
“Қишда болалар билан галма-галдан исиндик. Навбатма-навбат тушлик қиламиз. Ҳаво жуда совиб кетган кунлари болаларни тўшакларга ўраб ташладик. Ҳаммамиз навбат билан ухлаймиз”, дейди Маҳмуроднинг рафиқаси.
Душанбедаги Шоҳмансур туман прокуратураси журналистларга фирибгарлик иши бўйича суриштирув ишлари давом этаётганини билдирган: жиноий иш очилган ва жабрланувчилар сабр билан кутиб туришлари керак.
Ўн ойдан бери чодирда қолаётган Саидовлар қаҳратон қишни ортда қолдиришди ва эндиликда жазирама ёзни кутишаяпти. Уларнинг мебеллари ёмғир ва қор остида қолиб, чириб кетган.
Айни пайтда тергов ишлари, кейин эса суд қанчага чўзилади, улар ўз уйларини қайтариб олишадими-йўқми – ҳозирда Саидовларга бу ҳақда ҳеч ким аниқ гап айта олмаяпти.