5 апрель куни Қора денгизда НАТО ва Украина ҳарбийларининг “Денгиз қалқони 19” деб номланган қўшма ҳарбий машғулотлари бошланди¸ деб хабар тарқатди Украинанинг НАТОдаги ваколатхонаси.
13 апрелга қадар давом этадиган бу уруш ўйинларида Руминиянинг 14 та ҳарбий кемаси¸ шунингдек Болгария¸ Канада¸ Греция¸ Ҳолландия ва Туркиядан жами 6 та кема ва 2200 дан ошиқ денгизчи иштирок этмоқда.
НАТОга аъзо давлат Ташқи ишлар вазирларининг куни-кеча Вашингтонда бўлиб ўтган йиғинида Россиянинг Украинага нисбатан эҳтимолий агрессиясига нисбатан бериладиган жавоб чоралари муҳокама қилинди.
Бу чоралар ичида Украина кемаларининг Керч бўғози ва Азов денгизидаги хавфсизлигини таъминлашга қаратилган ҳатти-ҳаракатлар ҳам борлиги айтилмоқда.
НАТО Бош котиби Йенс Столтенберг Украина ва Грузия билан ҳарбий ҳамкорликни кучайтириш режаланаëтгани ва қўшма машқлар бу икки давлат ҳарбийлари ва соҳил қўриқчилари ҳозирлигини кучайтиришга ëрдам беришини билдирди.
25 ноябрь куни Россия ҳарбийлари аннексия қилинган Қрим соҳили яқинида учта Украина ҳарбий кемаси ва унинг бортидаги 24 денгизчини қўлга олган эди. Украин ҳарбийлари Россия томонидан чегарани ноқонуний кесиб ўтишда айбланмоқда. Бу ҳаракатни агрессия деб атаган Украина ўз денгизчиларининг уруш асирлари эканини айтмоқда. НАТО ва Ғарб ҳукуматлари Киев позициясини қўллаб-қувватламоқда.
Қора денгизда бошланган қўшма ҳарбий машқларга муносабат билдирган Россия¸ бу ҳаракат орадаги кескинликни янада кучайтиришини таъкидлади.