Руминиянинг собиқ президенти Ион Илиеску 1989 йилдаги инқилоб пайтида содир этилган жиноятларда айбланиб судланади.
“Бу тарих олдидаги қарзини узишга ҳаракат қилаётган Руминия одил судлов тизими учун ўта муҳим онлардир”, - деди прокурор Августин Лазар Бухарестда 8 апрель куни қилган чиқишида.
1989 йилнинг 22 декабрида руминлар коммунистик режим диктатори Николай Чаушескуни ҳокимиятдан ағдариш учун қўзғолон кўтарган эди. Қўзғолончилар қочиб кетаётган Николай Чаушеску ва унинг хотини Еленани Тимишоара шаҳрида қўлга тушириб, гуёки судлагандай бўлиб, отиб ташлаган эдилар.
1970 йилларда Чаушеску ҳукуматида вазир бўлиб ишлаган Ион Илиеску Чаушеску ҳокимиятдан ағдарилганидан сўнг мамлакат назоратини қўлга олган Миллий қутқарув фронтининг лидери бўлган. Узоқ йил давом этган тергов натижасида Илиеску ҳокимият назоратини қўлга киритганидан сўнг, қўзғолон якунлангунига қадар 862 одам ҳалок бўлгани аниқланган.
“1989 йилдаги инқилоб пайтида содир этилган жиноятлар жазосиз қолдирилмаслиги шарт”, - деди 8 апрель куни мамлакат президенти Клаус Йоханнис.
Ҳозирда 89 ёшда бўлган Ион Илиеску 1990 -1996 ва 2000-2004 йилларда Руминия президенти бўлган.