Суданда ҳарбий тўнтариш оқибатида мамлакатни 30 йил бошқарган президент Умар ал Башир ҳокимиятдан ағдарилди ва қамоққа олинди.
-Мен мудофаа вазири ҳамда Хавфсизлик қўмитаси раиси, режим ағдарилганини эълон қиламан. Унинг етакчиси Умар ал Башир ҳибсга олинди ва хавфсиз жойда сақланмоқда, - деди мудофаа вазири генерал-лейтенант Авад ибн Авф пойтахт Хартумда телевидение орқали қилган чиқишида.
Президент Умар ал Баширга қарши норозилик намойишлари Суданда 4 ой олдин бошланган эди.
Мудофаа вазирининг айтишича, кейинги икки йил давомида мамлакатни Ҳарбий кенгаш бошқаради ва шундан сўнг сайловлар йўли билан ҳокимиятга келган янги ҳукуматга ўрнини бўшатади.
1989 йилда ҳукуматни ағдариб ҳокимиятга келган Умар ал Баширга қарши намойишлар мамлакатда нархнинг ошиши ва нақд пул етишмовчилиги ортидан бошланиб кетган эди.